Зерсистемаҳои таъминотӣ дарунтар
Дар Дарси 44 панҷ зерсистемаро ном бурдем. Ҳоло дар ҳар кадом чӣ ҳаст, мебинем.
Таъминоти иттилоотӣ
Маҷмуи маълумот, ки дар манбаъҳои гуногун нигоҳ дошта мешавад. Пеш аз ҳама – воситаҳо ва усулҳои сохтани махзани маълумот. Системаи таснифот ва рамзбандӣ муҳим аст: ҳар махзани маълумот маълумотномае дорад, ки қисми тавсифии он рамзбандӣ шудааст. Ба ин зерсистема нақшаҳое дохил мешаванд, ки хатсайр (маршрут)-и ҳаракат ва ҳаҷми иттилоотро муайян мекунанд.
Боз системаи санадҳои ба шакл даровардашуда (унификатсия) ҳаст: онҳо дар сатҳи давлатӣ, ҷумҳуриявӣ, соҳавӣ ва минтақавӣ омода мешаванд. Барои омода кардани санадҳо стандартҳои махсус ҳаст, ки инҳоро талаб мекунанд:
- шакли санадҳо яксон бошад;
- таркиб ва сохтори реквизитҳо (маълумоти ҳатмӣ) ва нишондодҳои санадҳо яксон бошад;
- тартиби ҷорӣ кардани санадҳо, қабул ва бақайдгирии шаклашон танзим шуда бошад.
Таъминоти техникӣ
Маҷмуи воситаҳои техникӣ ва ҳуҷҷатгузории мувофиқи онҳо, ки кори СИ-ро таъмин мекунанд: амсилаҳои компютерҳо; таҷҳизоти ҷамъоварӣ, нигаҳдорӣ, коркард ва содироти иттилоот; таҷҳизоти интиқоли маълумот ва хатҳои алоқа; таҷҳизот барои корҳои ташкилӣ ва нусхабардории худкори иттилоот; маводи корӣ. Воситаҳо, сохтор, тарзи ташкили истифода ва раванди технологӣ бо тартиби ҳуҷҷатгузорӣ расмӣ карда мешаванд.
Таъминоти математикӣ ва барномавӣ
Маҷмуи усулҳои математикӣ, амсилаҳо, алгоритмҳо ва барномаҳо барои иҷрои масъалаҳои СИ. Қисмҳои таъминоти барномавӣ: нармафзори системавӣ (барномаҳое, ки имкониятҳои функсионалии компютерро васеъ мекунанд, ва барномаҳои назорат ва идоракунии раванди коркард), нармафзори махсусгардонидашуда (бастаҳои барномаҳои татбиқӣ барои СИ-и мушаххас) ва ҳуҷҷатҳои техникӣ.
Таъминоти ташкилӣ ва ҳуқуқӣ
Ташкилӣ – маҷмуи санадҳое, ки муносибатҳои дохилии коллективро танзим мекунанд ва қоидаҳои истифодаи воситаҳои техникиро аз тарафи кормандон муайян мекунанд.
Ҳуқуқӣ – маҷмуи санадҳои меъёрии ҳуқуқӣ; мақсади асосӣ – риояи қонунгузорӣ. Қонунҳо, амру фармонҳои давлатӣ, қарорҳои мақомоти давлатӣ, дастуру фармоишҳои вазоратҳо, муассисаҳо, ташкилотҳо ва мақомоти маҳаллӣ ба он дохил мешаванд.
Системаи дастгирии қабули қарорҳо (СДҚҚ)
Таркиби СДҚҚ аз се қисми асосӣ иборат аст: махзани маълумот, пойгоҳи амсилаҳо ва зерсистемаи барномавӣ. Зерсистемаи барномавӣ ин се қисмро дорад: системаи идоракунии махзани маълумот (СИММ), системаи идоракунии пойгоҳи амсилаҳо (СИПА) ва системаи идоракунии интерфейс (робитаи корбар ва компютер).
