Дарси 29. Танзими MS PowerPoint

Танзим чист

Барномаҳои Windows ба корбар имкон медиҳанд, ки намуди равзанаҳоро мувофиқи табъи худ созад ва барои худ муҳити кории роҳат ба даст орад. Ба танзим овардани барнома маънои онро дорад, ки шакли зоҳирии равзана ва маҷмуи афзорҳои бандҳои менюи он тағйир дода мешаванд. Дар PowerPoint ин осон ва ҳатто қисман худкор аст.

Равзанаи «Интихобҳои PowerPoint»

Интихобҳои (параметрҳои) PowerPoint-ро аз банди Парванда ва зербанди Интихобҳо ба танзим меоранд: Парванда → Интихобҳо (Файл → Параметры). Равзанаи робитавии Интихобҳои PowerPoint (Параметры PowerPoint) мекушояд.

Равзана ду қисм дорад: номгӯи бандҳо (тарафи чап) ва интихобҳо ё афзорҳои танзимшавандаи банди интихобшуда (тарафи рост). Бандҳо инҳоянд:

• Умумӣ (Общие) – муҳити умумии кор: минилавҳаи афзорҳо, азназаргузаронии динамикӣ, нақшаи рангии барнома;
• Имлосанҷӣ (Правописание) – худбадалкунӣ, худтасҳеҳкунӣ, имлосанҷӣ, форматбандии матн, луғатҳо;
• Сабткунӣ (Сохранение) – нигаҳдории рӯнамоҳо, сабти худкор, ҷузвдони сабти худкор;
• Забон (Язык) – забони таҳрир, маълумотнома ва интерфейс;
• Иловагӣ (Дополнительно) – тасҳеҳкунӣ, буридан, нусхагирӣ, ҷойгузин, сифати тасвир, экран, рӯнамои слайдҳо, чоп, овоз;
• Танзими тасмаи афзорҳо (Настройка ленты) – афзорҳои тасма;
• Лавҳаи дастрасии фаврӣ (Панель быстрого доступа) – афзорҳои лавҳаи фаврӣ;
• Болосохт (Надстройка) – замимаҳои иловагии барнома;
• Маркази идораи амният (Центр управления безопасностью) – танзимоти амнияти барнома.

Ҳангоми кушодани равзана ҳамеша банди Умумӣ кушода аст: он муҳити умумии корро ба танзим меорад. Масалан, бо он минилавҳаи афзорҳоро ҳангоми ҷудокунии матн намоён ё ноаён мекунанд, азназаргузаронии динамикиро фаъол ё ғайрифаъол мекунанд ва бо нақшаи рангии барнома ранги пойгоҳии равзанаро муайян мекунанд.

Имлосанҷӣ: худбадалкунӣ

Зербандҳои банди Имлосанҷӣ барои танзими худбадалкунӣ (иваз кардан), худтасҳеҳкунӣ, имлосанҷии худкор, форматбандии матн ва луғатҳо хизмат мекунанд. Худбадалкуниро бо Парванда → Интихобҳо → Параметрҳои худбадалкунӣ (Файл → Параметры → Параметры автозамены) кушоед: равзанаи дигаре пайдо мешавад, ки якчанд тугмаи қабатӣ дорад.

Тугмаи қабатии Худбадал (Автозамена) ба шумо имкон медиҳад:

• тугмаҳои худбадалкуниро намоён ё ноаён кунед;
• хатогиҳои тасодуфиро худкор ислоҳ кунед: масалан, ҳарфи якуми ҷумларо калон кунед, аз ду ҳарфи калони ибтидоии калима дуюмашро хурд кунед;
• баъзе тугмаҳои ҳарфиро бо аломатҳои формулаҳои математикӣ вобаста кунед;